Di sigûr tes famèes di Buje 'e son inmò riserves di fotografies, ch'e vignaran in lûs un pôc a la volte. Cumò, intani, j ài cjatât une miniere là di Neva Eustacchio (n. 1922) che sta a Dartigne, ma 'e jere di Solaris.
Serge Tonino al maride, in tal 1959 a Brazzaville, Françoise, le fie dal Comandant de Roërgas. Lui 23 ains, jê 22, e varàn doi fîs.
El pari Giobatta Tonino (Tite Siorcheco di Ursinins Piçul) al jere rivât in tal 1957 par fâ el cuviert de centrâl eletriche sul Djoué (un afluent dal Congo) cun Enea Nicoloso come capo cantîr. In seguit, decines di ains di cuvierts e asfalts.
Tite al tornarà a Domont par “murî”; al è soterât a Buje a San Bortul.
Serge e Françoise e mòlin el Congo tal 2004 par sistemâsi dongje Domont e, dongje de parentât, amîs e chel fregul di atmosfere furlane mantignude lì.
El pari di Françoise, el Comandant de Roërgas, al vignive fûr di une schirie nobil di militârs, servidôrs de Marine, de Justizie, di Ordins militârs, di Templârs, de Leteradure, di Res e di Napoleon.
Fra mieç dai spadacins si cjate un Leonard de Roërgas, segnalât te famose batae d’Azincourt ai 25 di otobar dal 1415. Une disfate, che come conseguence e viodarà le France ocupade dai Inglês par cent ains.
Pui dongje di nô, Alfred de Roërgas de Serviez, tenente tal esercit di Napoleon, fi di un gjenerâl de Campagne d’Italie, si cjate tal 1808 sui Pireneus pront par invadi le Spagne. Ma eco che s’inamore de femine di un altri gjenerâl, mari di doi fruts, ancje lui sposât cun doi fruts. Ducj i doi e decìdin di plantâ lì omp, femine, fruts, cariere militâr, sigurece, onôrs di ogni sorte par scjampâ a cjaval viers cualchi puart bretòn par rivâ in Inghiltere. Chest Paîs ju refude e lôr s’imbarcjin pe Americhe. Lì lui al ven a savê che el Venezuela si è ribelât cuintri le Spagne par concuistâsi le indipencence. Si presente ai ribei e cul so prestigjo di uficiâl napoleonic al è subit acetât e gradît. Si cjate di gnûf denant el nemì di iar, le Spagne, e al spere cussì di riscatâsi pe sô diserzion.
Bolivar lu nomene gjenerâl cul compit di istruî i uficiâi. El Roërgas al sarà a cjâf de citât di Cartagena assediade. Durant l’assedi e muerin Stefanie, le femine puartade vie de France, e ancje el frutìn vût insieme. Bolivar lu incjarie di âtres missions impuartantes pe liberazion di chel toc di Venezuela ch’al deventarà le Colombie. Ae fin al vignarà cjapât in trapule e copât. Ducj i scuelârs de Colombie lu cognossin e lu venerin, in France invessit al è scognossût dal dut. No si perdone ai disertôrs. Par un cert timp el dipartiment di Meta, in Colombie, al à cjapât el non di Serviez. (1)
Ce gust a cjatâsi insieme lì di chê copie “calorose”, Serge e Françoise, e sintîju a contâ… le nassite di Françoise, prime francese nassude a Banghi… le mari parturiente assistude di un zovin miedi e di une muinie in presince dal “boy-panka” che cul pît al môv un ventiladôr… une pantere nere che jentre in chê misare barache-ospedâl par complicâ les robes e fate scjampâ a fuarce di sdrondenâ pignates.
Françoise si vise, di frute, di vê sintût el tam-tam e il coment de int: “E cirin cualchi poar gjaul… par mangjâlu…”
Mi fevelìn dal flum Congo ch’e traviersavin par fâ le spese tal Congo Belgjo, pui furnît di dut. Ma le segregazion d’in chê volte ti obleave a fâ le code su tre files diferentes: i Belgjos… i Francês… i Neris.
Le “epopee” dai Roërgas-Tonino, une storie romantiche, patetiche, aventurose, scandalose, ma mai noiose e finalmentri une storie di lavôr furlan tal mont.
A scoltâju ducj i doi, o percepìs el strepit des armes, el tam-tam african, el rugnament de pantere e par concludi el dai-dai dai Furlans, el lôr ingen, lôr uniche nobiltât.
Vite lungje a di chê copie, ae lôr prole e a di chel Spirt furlan che si insede ancje in vissares inaspetades.
1 – Informazions tirades fûr dal numar 146 de riviste “Historia” 1959.
