Quanche une robe si le à e si le gjolt no si impensisi di vêle. Quanchè 'e scomence a jessi in pericul e si scrupùle ch'e va a pierdisi, in chê volte duc' 'e fevelin di jê. Un al dîs ce biele ch'e ere, un âtri ce ben ch'e stave, un tierc ce biele figure ch'e faseve, un quart duc' i vantaz ch'e puartave.

Al é il moment che la robe 'e sparìs pardabon! Però fâle sparî bot e sclop e cence fâj un monument par ricuardâle al é masse: 'e jé une plae cu la gruse ch'e reste e i nostalgjcs di jê ti fasaressin tribulâ. Po ben. Vuè al é dut risolvibil. 'E jé la fotografie ch'e inmortale chê robe ch'e à di íâ su pai stecs. Une biele mostre di fotos dulà che la robe 'e jé presentade par ogni cjanton, in blanc e neri e a colôrs. Adiriture dôs, tre, mostris di fotos e magari cun resonadis di taule taronde sul parcè ch'e à di scomparî o parceche 'e jé scomparide. Dut chest preambul 'o saveis là ch'al va a parâle.

'O feveli de Ledre, no dal canâl de Ledre, ma dal flum de Ledre, chel ancjemò libar par prâz e cjamps e che ogni tant si sglonfe e al fâs il delit, puarìn!, di parâ sot un sterpêt, une cisute, tre cumieriis di blave. Pe Ledre naturâl la vite 'e semèe fìnide dal dut. Ministradôrs e pulitics, une vorone esperz di modon, siment e clap (e che di Buje 'e àn fat un centro tipo American City) 'e àn stabilît che la Ledre cussì come ch'e jé no pò stâ. Tu âs sintût un gjespâr di chêi, come ai timps ch'e vevin pensât di fâ l'anel des corsis di autocross e motocros de bande di Artigne e di Codês. "Italie nestre" si è mote.

Il "Tomât" si é mot. I "Balarins di Buje" si son moz. Il popul si è inviât. Il cumun alore al à fate une biele mostre di fotos su pe Ledre in municipi cun tun concors di pueste. Fûr concors 'e ere esponude une maraveôse schirie di viodudis de Ledre, ancje dal lavadôr di Cjasesole requie, dai àins di un Friûl mancul siôr, ma plui net, di Tarcisio Baldàs.

Al é stât un sucès meretât. Tal stes timp cui sòliz cuintrialtârs di paîs, che, se tu fasis alc, un âtri al à di fâ compagn o di miôr, 'e jé stade organizade un'âtre mostre su lis aghis di Buje, tant par no fevelâ di Ledre. Cun dut chest discori de Ledre preparaisi a viodi qualchi gru e qualchi camion di siment e di clas, che la facende 'e jé serie. Pessuz e uceluz, gjambaruz e pòmule di pôl stait atenz "'per chi suona la campana". Chei biêi scjans di savalon e ches aligutis di aghe dolce petenadis de curint come cjavêi di agane e i sgoifs e lis pleis des rivis 'e stan par dînus mandi.

O vignarajal qualchidun a salvâ in estremis la barache? Si sint a cori vôs che la taviele di Buje 'e jé pronte a ospitâ un bosc di condomìnis di veri e fíêr dula che il ricuart di rois e flums al varà il so spiêli. Sono cjàcaris? 'E dìsin che cence edilizie no jé nissune delizie. E nol é di preocupâsi masse de Ledre o dal Vejât "retiflcât" plui a mont e che nol spant vie pai glereons. L'aghe drete 'e larà jù du buride fìn te Basse a fâ pôre a Latisane. E dopodut al é il mût di dî dai nestris viêlis: "Dopo tanc' àins e tanc' dîs, l'aghe 'e torne tai soi paîs".