Foto varie

Di sigûr tes famèes di Buje 'e son inmò riserves di fotografies, ch'e vignaran in lûs un pôc a la volte. Cumò, intani, j ài cjatât une miniere là di Neva Eustacchio (n. 1922) che sta a Dartigne, ma 'e jere di Solaris.

Le Androne di Pič a Ursinîns e divît, si fâs par dî, el “arondissement” Sòc, Mian, Gasète e Čucàt de sprolungje, fin te androne di Bulòt, di Dolfo orloâr, Dèle, Noemi di Pič, Gjdio di Pič al è in fons de androne.

’E jè un luc, a sotèt, pal zuc dai fruz dal borc e pal pečotâr conch’al ven cule sô marcanzìe a vendi e a comprâ creps e feràge.

Dolfo l’orloâr al fâs un mistîr che lu ten in cjase sentât sot un ferâr cule lint in tun vôli pes manovres dentri dai orlois e des svearines di justâ; ognitant une cjadenute di àur par un frut ch’al nàs o che si cresime (in chei àins si usave). Al vignive, par origjne, di Majan, ma chest nol conte, jo lu ài cognossût alì, te cjase tacade de androne. Ines, le sô femine, ’e ven di Conoglàn. El gno ricuardâ al è come el segno di San Marc dopo le sgjernete dal burlač.

Ancje jo ’o soi stât a tirâ le bilestre tôr el bussulòt tal zuc ch’al jemplave les ores dal dopomisdì e ancje i fîs di Dolfo: Danilo, plui grant, e Luigino, plui zovin di me, ’e zujavin te gubie dal borc. Odila, frute, ’e veve altre compagnie.

A voltes al passave Slàbar el gjelatâr cule Ape e le trombete e si cuminave di lecâ un gjelato di dîs e al pareve di vê fresc, ma, tal zuc, si tornave a sudâsi.

E par usance si lave discolz.

Le strade (come le androne e le plačute di Sant’Osèf e il curtîl di Siorchêco) ’e ere blancje.

I fruz pičui ’e cressin e po’, deventâz omps e paris di famée, ’e fàsin la lôr vite cules regules de sô famée ma el ricuart di chêi che ju àn cognossûz ju compagne come se nol fòs passât mai el timp.

Luigino al ’ere un frut ben metût.

Come ch’o disevi cul lâ indenant de vite mil robis si mùdin e par câs e par volontât.

Luigino al à cjapât in man le aziende di so pari e cun mistîr e passion al à progredît fin a fâle cognossi ancje fûr dal paîs e al à vût risultâz che ’e mòstrin ce brâf ch’al ’ere tal so lavôr. Une dì mi spegave di cemût che in Olande ’e tàin i diamanz e tal fevelâmi i lusìvin i vôi pal gust ch’al veve di contâ e jo ’o capìvi trop che j plaseve fâmi cognossi cheste sô esperienze.

Lu à cjapât le passion sportive, pe veretât no mi impensi cuant, ma indaûr tal timp e massime il lunis che le buteghe ’e ’ere di turno sierade, lu vedevi daspès in tignude (d’unviêr cule tute e d’astât cui bregons curz) a còri par Majan e Mels e al mostrave mistîr e passion.

No sai duc’ i passàz dai soi alenamenz, ma al cognosseve strades e stradeles de zone culinâr e tròis di mont e, di sigûr nol cirive di periculâ.

Al à vût il plasè di incjastonâsi, come i siei diamanz, te nature.

Le passion si sbròche tai afièz, lui al à vût siguramentri l’afièt pe famée, pe femine e  pai fîs, ma al à vût ancje il gust di sei di Ursinîns.

Ursinîns al è gambiât in tantes robes ma in tune al è simpri restât compagn: in te int che lu vîf ’e jè restade le passion dal ricuart e chel si esprim soredut in te Sagre di Sant’Osef. Le int ch’e lavore: simpri chê (ben o mâl ma ’e jé cussì).

Il cuadri di Arnaldo cun chê luminositât ch’e dîs el jessi dal borc: seren. Il cjatâsi cule int sot il tendòn par un mangjâ insieme e cule musiche plui o mancul ben sunade de orchestrine di turno.

Le disponibilitât di cualchidun ch’al po’ di plui a judâ la publicazion dal libri “Buje Pore Nuje!”, ch’al pâr deventât un classic come la Divine Comedie par cualitât dal scrit e le ricjece de ricercje e des documentazions.

Dut al è finît tune domenie: adore pe ore dal matìn, adore pe etât e Luigino dal alt dal Cjampòn al è sbrissât par finî el so periodo uman. Cumò al è tal celest dal cîl che la lûs ’e po inceâ i diamanz e il lusôr no si apanìs cun nissun nûl e il timp no si conte plui cul orloi.

Là al è corèt ch’e finissi la vite dal oresin; lì al è corèt scomenčâ la gare, che no finìs, cule eternitât.

Lì si cjatarìn nô crodinz di Ursinîns.

Mandi Bililo, al è stât biel vivi la vite dal nestri borc.

Note.