Prime dal taramot la Regjon 'e domandà ai Comuns dal Friûl quai ch'a èrin i problems dai lôr centri storics, e plui di qualchi sindic al rispuindè che il so Comun nol veve... nissun centri storic! Vuê si puès ridi di chês rispuestis, ma no masse parcèche and'è ancjmò tante di int ch'e crôt che un vêr centri storic lu vedi dome une grande citât, come Rome o Milan. A Buje, o' sin lâz a domandâ, vie pes borgadis, ce ch'a pènsin dal centri storic. Prime di lâ a lei lis rispuestis stampadis dapît, al conven precisâ che il centri storic al è un "baricentro", ch'al puès ancje gambiâ pusizion e che dispes, almancul in princìpi, al ven indicât de nature stesse (une isule tun flum, une culine), ma al nas ogni volte che une comunitât 'e decît di ocupâ une tiere e 'e tache a tiràsu cjasis e a organizâ la sô vite social. Par antic il centri (no ancjmò storic!) al è un pont ben difindibil, e al è naturâl che tal chel luc la comunitât 'e fasisu cjastiei e glesiis, palaz e municipis, ven a stâj lis robis plui impuartantis e di difindi a ogni cost. Al è par chest che, avonde dispes, tal centri storic si cjàtin lis costruzions plui antighis, i monumenz; ma une zone archeologjche no è plui il baricentri di une citât o di un paîs che si è ingrandît e, soredut, al è plen di int ch'e vîf metìn une vite no plui contadine o marinare o comerciâl (come secui indaûr) ma industriâl e terziarie. Un centri storic al à, par solit, un aspiet monumentâl, ma al puès vivi dome se al reste il baricentri de comunitât. Buje in chest quadri, e je adiriture une realtât , didatiche, ch'e pâr fate pai studenz di architetu re e di urbanistiche! Il so prin centri storic, fin dai secui de protostorie, al fo in Mont, e al restà lassù per tant timp, ancje dopo che la colonisazion latine 'e veve fat nassi, come che nus spie la toponomastiche, i "centris" di Urbignâ, Ursinins, Colosoman e âtris, parceche Mont al ere il puest plui sigûr. Ancje i Statûz de Comunitât a' forin votâz in Mont ai 8 di dicembar dal 1371. Ma in chê volte 'zà il cjstiel al ere miez ruvinât: segno che il baricentri civil e economic de comunitât al lave gambiansi. Di fat al ere 'za passât un secul di quant che i predis si erin stracâz di stâ in Mont e a' erin vignûzju pe cure di une popolazion sparnizzade vie pes culinis e a' stavin a San Sciefin e a Madone. Mont al restave il cûr spirituâl e il simbul de comunitât di Buje, ma nol podeve plui pratindi di jessi iLmotôr de vite di sîs mil e passe personis! Cussì il baricentri di Buje al sbrissàju di Mont tanc' secui indaûr e nol è stât plui pussibil ripuartâlu su. Plui in bas a' erin nassudis tantis vilis, cun tantis glesiis, e tanc' altris centris, magari pizzui, ma la partide pe centralitât di dut il comun 'e restave viarte dome par Madone e San Stiefin. Le à vinzude Sant Sciefin, pe sô posizion plui centrâl e plui comude par duc'; parceche un centri storic al nas e al cres par un insieme di fuarcis ambientâls, economichis e pulitichis tant plui fuartis dai boins sintimenz. E che nissun al disi che, dopo il taramot, al reste ben pôc di "storic" tal centri di San Sciefin dulà che ormai nome il Domo al ricuarde il "buon tempo antico". A San Sciefin al ere un vicjari 'zà tal Quatricent, e a partî dal Cinccent la sembee dai capos di famee 'e fò radunade simpri su chê place! Ce si vuelial di plui par dî che un centri al è storic di almancul cinc secui? No son i monumenz, o no nome i monumenz, ch'a fasin storic un centro: al è l'interes secolâr de interie comunitât che lu fâs nassi e che lu fâs vivi. Eco che, alore, il centri nol è storic fin ch'a stan in pins i mûrs antîcs: al sarès come dî ch'al baste un taramot par scancelâ la storie! Chei mûrs lu rindin plui biel, preziôs, carateristic, ma la storie 'e esist ancje cence di lôr. Caso mai, lis antigais nus dan la pussibilitât di no pensâ, di no progjetâ un futûr pal centri storic: guai a tocjâlis, a' son reliquiis! Buje, invezit, 'e je stade metude dal taramot te condizion di scugnî inventâ une gnove muse pal so antîc baricentri, e in chesc'ultins ains 'e à capît che la place di San Sciefin 'e puès deventâ o un zardin o un parking. La soluzion storiche, veramentri in linie cu la storie, 'e je chê verde, parcéche chel plazzâl al fo simpri vert, di òrz (come che si viôt tes fotografiis di' 'Buja: cent'anni") e di teis, lis plantis che tes placis dal Friûl a' fasevin ombrene ai capos di famèe radunâz in vicinie. E nol è dit che fra i arbui nol resti qualchi splaz pai automobii di chei ch'a scugnin dimostrâ ch'a son nassûz!