Zio Tite, in Venezuela, al à une imprese, fornâs e implant di lavagjo de grave e Armando, partît dal 1952, al rive lì e al impare el mistîr sules ruspes. Al reste lajù par dîs ains.

Quant ch’al torne a cjase al è il 1962: si scomence a pensâ a drečâ strades, a fâ capanons industriâi, a doprâ grave di Tiliment, a fâ betonagjo, alore lui, che sì al è un di chêi di Busùt, cognossûz, ma culì no san ce ch’al è bon di fâ, al compre, cui francs sparagnâz, une pale mecaniche e al met su une dite individuâl: par capîsi al è paron e operari.

Tacâ al è simpri dificil massime se no tu âs un document di mostrâ ma, se si ûl, si cumine e lui, grazie a qualchi amì, al cjate le fate di ’entrâ tes gjaves di marmul a Tamàu e inte ferovie a Dogne.

Chest lu fâs cognossi in zone e al scomence a lavorâ e a mostrâ la sô braûre di impresari.

Tal 1963 al compre un camion “Fiat 82” cun Primo de Cuche, so socio fin al ’69. El camion al ere rôs. Ancje el colôr al spìe le imprenditorialitât infati si viôt: ’e jè publicitât.

El lavôr al va ben e ta chel periodo di avantač al vierč cun so cusìn Roberto (si è tal 1970) la “CEMENTI NICOLOSO s.a.s.” par furnî peton e, sul puest clamât Ferade, al met sù un implant di betonagjo.

Cumò alì ’e metin sù el tendòn pe fieste di Sant’Osef ma, in chê volte, sorestant, diretôr e vuardie gjurade al ’ere un omenut cul bochìn: neri el prin toc e po’ di metal lustri e cule cjemese o blancje o celestine, ma simpri mànie cun tun ravâj, un omp di non Gjovanìn: pari di Armando.

El timp al va, le aziende si svilupe, al ven el taramot: duc’ ’e àn bisugne di finî, di disfâ e di tacâ a fâ gnûf, al è cussì che, cjolt altris machinaris e altre int, restant simpri però artesan, al sposte maseries, al dilibere strades e al furnìs el prodot pes platèes dai prefabricâz a dut el Cumun di Buje.

Al lavore par plui di trente àins in te Z.I.R.O. lì di Pitìn par fâ scavos prin di fâ-sù gnoves costruzions, al demolìs j’intrìcs, al fâs manutenzions (spostâ scuries e paltans), al slargje plačâi...

Al è presint a Buje pal scavo e par furnî peton ae costruzion di “Buje Centro”. Al è a butâ-jù capanons par costruî el complès comerciâl “Alpe Adria”. Al à lavorât par ogni sorte di industrie o aziende artigjane de zone.

Tal 1980 si comprin doi loz te Zone Artigjanâl in vie Polvaries e, tal 1981, si scomence el capanon che si finìs tal 1983. Tal 1985 si compre un gnûf implant di betonagjo, plui funzionâl, e si sposte el sît de dite in mût definitîf.

Dal 1986 si compre une gjave di grave che, esauride, ’e devente une discjarie di inerz di 2e categorie tipo A, fin dal 2003. Tal 1998 si compre un implant di frantumazion par ricupero dal materiâl inert ch’al ven des demolizions e si fâs une convenzion cul Cumun di Buje par acetâ sore grazie el materiâl puartât dai privâz dal Cumun.

Tal 1990, cul acorpament di duc’ j’implanz da part des grandes societâz ch’e produsin ciment, al ven cedût l’implant di betonagjo e ’e ven potenziade le ativitât di scavos e demolizions cul rinovament dal parco machines (scavatôr, rulo compressôr, miniscavatôrs, camion di 50 q.) par podê dâ un servizi aes gnoves richiestes dai clienz e cul cjoli atrezadures simpri plui agjornades pal recupero e el tornâ a doprâ i materiâi di demolizion.

Tal 1997 le societât ’e devente “NICOLOSO SCAVI s.n.c. di Nicoloso Armando e figli”.

Stefano e Giuliano, dal 1985 e dal 1989, rispetivamentri, ’e jentrin a fâ part de societât simpri lavorant e simpri cule guide dal pari par mantignî le pulitiche aziendâl finalizade a fâ restâ le aziende tune dimension artigjane.

I siêi dipendenz ’e an cjatât un ambient di famèe e rispièt e ricognossince pal lavôr ch’e an fat. Tanc’ ’e son chêi lâz in pension te dite e tanc’ ’e an plui di 20 àins di anzianitât aziendâl; un adiriture 35 chest an!

Corantecinc ains: un fruçon di timp par tre gjenerazions par capî, par fâ, par continuâ.

’E jè la storie di une albe ch’e devente plenece di zornade dal Orinoco, passant pe Ferade, fin ai Počôns.

Al è un impen ma nol è un traguart.