Dornenie 20 di març e son vignudes a Buje les autoritas (Zamberlèt, Comel e atris) a "celebrà" le "fine emergenza" pal nestri paîs.

Come a dì che, in fin dai cons, e dopo 10 mês dal taramòt, culì di nô nol é plui nissun pai trois.

A nô invessit al risulte che ancjemò une cinquantine di lôr, massime int che vîf bessole, e spetin un luc dulà poiasi. Podin stà contens però parceche Comel al à dite che cumò e àn capît ancje lôr de region che al sares stât miôr lassà l'apalt des baraches ai comuns; propit chel di Buje lu à mostrât ne vore ben cun le sô efficenze. No, par chel, che si vueli dì che les robes in region no van, al é nome che vint les robes sot voli si sà subite ce fà.

Sperin che al tegni a mens ce che al à dite e che magari lu meti in pratiche massime par regolà un tic di plui le gnove leç 17 ( TER pal moment) che mét ancjemò dute l'autoritât tes mans de regjon midiant un segretariàt e un slac di cumissions.

Magari nôme par contentà un pôc le int, che di quant che àn tacât a dai di intindi che a Triest e cirin fûr nome berdéis par dà vie bés a chei che sàn lôr, no ié plui cussì cuiete e e nase puce di frait un pôc par dut.

Si capis che a dà di plui autonomie ai comuns al é un pericul parceche si cor el riscjio che, chei dai pais, e tachin a cori ogni atre dì in comun a rompi les devosions magari nome par là a cirì el pêl tal ûf anc'e là che no bisugne là a cjatalu.