Duc' i miei amîs di Ursinins

Sant Josef, mê glesiute,

tu sês propit un bombon,

tu semeis dut une frute

ul vistît di comunion.

Ogni tant 'o pensi ai dîs,

ancje se mi ven il grop,

che a sunâ jerin in dîs

e a servî puar Vigj' Soc (gno pari).

E bastavin quatri glons

par fâ movi ogni famee,

cussì duc' fruz, granc' e vons

vie a messe di pre' Andree.

Sant Josef, un sant ninin,

su dal alt dal so altâr

cognossè sar 'Sef Tunin,

 i Siorcheco e Bep fornâr 

e sigûr ancje Pitac,

Ninute, Ghezie, la Mite,

e vadì Nenute Scac,

duc' golôs d'aghe di vite,

Toni Sâr, l'omp di Marie,

e, cul mus, Meni Jeroni,

Min scalcet, marît de Grie...

un sequeris, Di' perdoni!

Sant Josef di Ursinins,

di duc' chei, 'o dîs purtrop,

nond'è ùn restât inpins

cun chei lâz pal taramot,

e jo ormai cui dîs contâs...

Co duc' jerin miei amîs,

fâs ch'o ledi in sante pâs

a tabajâ cun lôr... in paradîs!

Buje 6 di setembar dal 1986