Oh, mame, mame!...

Un sigo che si piert

sot la maserie

'E rive a planc la muart.

'E brinche i pîs

sierâs dentri la smuarze

dai modòns

e dai trâs

po su, sù, fin al cûr.

Oh, mame!

La vôs   si piert in bocje.

La lûs si stude

sot une coltrine

simpri plui penze... Mame!

Se il dolôr al è grant

si sùin dutis lis lagrimis...

Tu cjalis to fî, muart

dongje di te

e no tu sâs parcè

che no tu vàis.

Lu àn tirât fûr apene de maserie

e tu tu pensis: Cui?

Tu cjàlis la tô man insanganade,

no tu sâs di ce sanc

che je bagnade.