Bepi inte grande farie nere

La esistence sô al lisime

Di buinore fin di sere

Lui al bat, al fore, al lime.

Il cjarbon al è so fradi

Chel che i fâs vuadagnâ il pan

E chel pôc di companadi

Ogni dì lunc vie dal an.

I siei agns a corin vie,

Ma par lui nie no si mude:

Fûc a l’albe al impie

E la sere lu distude.

Il so bati sul incuin

Al è eterni tant che il timp,

Di lontan nô lu sintìn,

Dut il borc cun nô lu sint.

E aromai la int usade

A sintî chel sglinghignâ

Za e pense a la zornade

Cuant che il fari al mancjarà.

E cidine e restarà

La sô farie dute nere

E buinore no varà,

Ma e varà par simpri sere.

Ancje il mai tant fracasson

Al starà cidin, cuiet,

E al pararà dabon

Che lu fasi par rispiet

Di chê man esperte e dure

Che par agns lu à doprât

E di lui e à vût cure

Lu à netât, lu à ingrassât.

Cumò il fari in Paradîs,

Par sigûr cence fâ nie,

Al ricuarde chei siei dîs

Cun rimplant e nostalgjie.

E jo o speri che Sant Pieri

Par discjoilu un momentin

Di chel so ricuart tant neri,

I regali un biel incuin.

Bepi alore rinfrancjât

Ciert ur fasarà biel biel

Un conciert improvisât