Mandi Nûfcent ! di Roberto Ongaro |
Mandi Nûfcent, cui tiei cjavâi, cu lis carocis, cul ciant dai gjâi, e cun chês cjasis plenis di sioris e orlois dai tors a sglongjâ oris. Tu âs comenzât malùt dabon, copant Umbert clamât re bon e lant a Tripoli a fâ la vuere sôl par fâj rabie a l'Inghiltere, cun Cjaurêt e la disfate cun invasôrs di ogni cuâl fate, cul re nanin imperadôr e Mussolini di menadôr, cu la cjanzon "musute nere" e cul nulôr, subìt sot sere, sôl di polente, vie pe borgade e cun canae magre e sblecade, cul siôr plevan cui cotolons e int pai cjamp in rogazions. Mandi Nûfcent cul to lavôr cirût cun trenos stonfs di vapôr, cui agns ridicui de Autarchìe e cu la vuere in Albanìe, ma tu âs vût ancje Gjelmo Marcon cu la sô gnove grande invenzion, e al è rivât il grant asfalt, dal otomobil cjapât d'assalt. Mandi Nûfcent des invenzions, ete dal radar e dai avions, di grandis vueris, bombardamenz vueris fra fradis, concentramenz ch'ai àn viodût l'ultime sere di tanc! ebreus in te risiere. e po l'atomiche cul fonc taront ch'e à scaturît dut cuant il mont. Secul speciâl, par dî 'nt sôl une: pe prime volte l'omp su la lune e po la grande television e il rai dal laser pe operazion scuvierte la peniciline ch'e fâs fâ un pas ae medisine e lômp ch'al slargje la cognossince e l'a.i.d.s. ch'al fâs la sô presince. Mandi Nûfcent dai granc' válôrs: patrie famee glesie e lavôr. Secul moderni, secul svearin, fat e disfat il mûr di Berlìn. Mandi Nûfcent dal comunisim, dal nostran fassio e dal nazisim. Mandi confins segnâz dal omp, cun te, l'Europe grande nazion. Mandi Nûfcent! Di me tu 'as vût i agns plui biei de 'zoventût, ma jo ti lassi cul cûr content, plen di ricuarz, Mandi Nûfcent! |