Al Chiarissimo dott. Ottavio Vidoni

Beneamato Medico del Comune di Buja

in occasione della consegna della Medaglia di Gratitudine popolare

di Giuseppe Ursella

(1931)

In cheste biele circostanze

in cheste rare ocasion

dopo lis bielis peraulis di elogjo

ben rivoltis al dotôr Vidon.

Iò, in seguit a chei elogjos

parevi bon a stâ cidìn

ma siôr Magistris mi cimiave

e un pocâmi di prè Gjovanìn.

O ripet, no ai competence

fasevi miôr a stâ sentât

il dotôr vorà compatîmi

cussì dut chest Comitât.

L’è inutil, ch’o ripeti

ce ch’e an dit chescj oratôrs

il dotôr Vidon che ducj lu venerìn

l’à dirìt di ducj i onôrs.

Chest ricuart che vuê i ufrìn,

opare d’un ilustre citadìn

che nus onore te grande Patrie,

ma che al dotôr i mertave prin

pai inumerevui beneficis

che lui par Buje l’à fat e al fâs

lui l’e pront ad ogni ore

lui nol mangje, nol duâr in pâs.

E cuant che par disgracie

improvise, l’è un grand mâl

lui in persone cul so automobil

al compagne il pazient tal ospedâl.

Il so bon cûr, la sô gran scienze

jè cognossude in ducj i paîs di dulintôr

e da grancj umin ai sintût che lui si merte

un monument plui alt dal tôr.

Lui, ta lis sôs visitis

nol à mai fate distinzion,

ise la cjase di une puare

o il palàç di un sioròn.

Viodinlu par chês cjasis

al jet di chei malâts

an ducj desideri

di Lui sei cunfuartâts.

Lis sôs peraulis dolcis

di zelo, di amôr,

il pazient ben si rassegne,

al dismentee ogni dolôr.

Buje e à vuê il vanto

di vê un miedi furlan e di profession

(une cime) nol fâs par lucro

ma par amôr e vocazion.

Par cognossi lis sôs dotis

cence reclam, cence iscrizion

il so ambulatori l’e simpri plen

ducj lu atìndin cun devozion.

E in chês fameis ch’al viôt miserie

vecjos, malâts e cualchi frut

oltre ae visite gratuide

al lasse il bon pe cjâr a pal pagnùt.

E cuant che dopo une lungje cure

cualchidun i domande il cont

pàssin dai mês prin di viodilu

e si pues lâ intant al altri mont.

La sô note mai no spavente,

cualchidun an pore prime

ma dopo viodût il cont

dìsin: «No vin pajât nancje la benzine».

Un’altre grande dote

al possiêd il nestri dotôr

di ducj i mai, ancje i pui intims

al à un segret di confessôr.

Mi pâr di induvinâ

e cert di no sbagliâ

che pui prest che assisti a cheste fieste

lui si sarès forsit eclissât.

O soi cert, e no mi sbagli,

che ducj di Buje e vulintîr

se ognun ves di esprimisi

al sarès dal gno pinsîr.

In chestis pocjis peraulis

detadis in presse ma cul cûr

jò i auguri tancj ains di vite

simpri a Buje, fin ch’al mûr.

Dotôr! Si degni di gradî chest piçul omagjo

che i Bujês ducj cence distinzion

son orgogliôs di ufrîi sculpide la sô efigje

e sculpît fra i aloros ancje il so non.

3 Febbraio 1931  -  A. IX