La gjate (conte gjavade di "Contis e racconti") di Pieri Menis

Dutis lis feminis dal borc 'e tabacavin ce plui ce mancul, ma Mie Dordul andi tirave sù plui che il mus semule. Tra jê e so missêr 'e svuedavin un veri daûr chel altri, come fâ tele. Si sintive a pestâ di tant in tant in ogni cjase, ma là dai Dordui chê musiche si sintivile ogni setemane: tantan... tantan... tal mortâr di piere, cul strangulin di fier.

Taresot 'e passave dispes a 'Zeà cu la sô cjarie di tabac di troi, ven a stâj cul tabac di cuintribant, tune sporte di stranc, mieze stramade, cu lis mantiis di pezzot, deventadis lustris di cragne. 'E stave a Trep, tal borc di Cente, tune cjasonate nere di fum, dentri la murae, insomp di un curtîl plen di urtiis e cun tun vecjo fijâr ch'al mandave fûr i soi ramaz parsore il puartel de jentrade. Par pore de finance o dai carbinîrs, Taresot, 'e leve simpri ator pes curtis. Par rivâ a 'Zeà 'e vignive sù pal broili dal miedi e po par cjavezzai e filis di morârs 'e rivave te Mussarie; e, di chì, par là di Gjarùs, su pe strade dal Pradulin, 'e rivave tal borc.

'E jentrave in dutis lis cjasis scomenzant lì di Cjastenêt, par finî lì di Ane Carete. "Comari, astu bisugne uê?" Si sentave su la prime cjadree ch'e cjatave 'e, pojade la sporte su la taule, 'e scomenzava a tirâ fûr un, doi, tre... siet pachetuz par un franc. 'E costavin quindis centesins l'un, ma al ingrues 'e tirave jù cinc centesins.

'O viôt ancjmò chei pachetuz quadrâz di cjarte colôr bree scure, ch'e nasavin cussì fuart di là tal zurviel. E quant che mê mari o mê agne Sofie mi fasevin pestâ ancje me cul strangulin tal mortâr di piere il tabac di troi, chel tuf ch'al vignive sù mi faseve tossi, stranudâ e i muscui dai braz mi dulivin di ingropâsi. Lôr, invessit, chês tabaconis, 'e gjoldevin a temesâ, une, dôs, tre voltis chel polvar biont; e po dopo a misturâlu cu la cinise e messedâlu, messedâlu cu la sedon di len.

Une confusion di no dî, in chê sere, ta l'arie di Dordul. Duc' chei des cjasis vissinis 'e jerin vignûz a judâ a scussâ panolis: doi cjarons che i bûs 'e vevin stentât a menâ dongje de braide gnove, la dì prime. Si sintive fin in cusine a sgorneâ tai scus, a cjacarâ, a ridi, a contâ storiis. Mie, la parone di cjase, parvie che, muarte la vecje dai Dordui, 'e jere la prime brût, lavade la massarìe, 'e veve metût a cuei su la flame dal fogolâr lis balotis ch'e varessin mangjadis dopo fìnide la vore duc' insieme, mandanlis jù cun tune tace di vin gnûf.

No mancjave mai une tace là di Dordul a chei ch'e davin une man. Tra une grampe di stecs e un manel metût sul fûc, Mie si jere metude a misturâ il tabac di nâs: cun tun pugn di cinise e dôs gotis di ueli 'e vignive une prese plui che gustose. Andi veve plen un cjadin e cu la sedon di len lu messedave ator ator come che si fâs cul savajon, po lu saborave di sot sore, lu pressave, par tornâlu a savoltâ di gnûf.

Un profum sutîl di tabac si spandeve par dute la cjase e al jessive parfin tal curtîl. Finide la operazion, Mie 'e veve jemplâz tre butilions e cumò, prime ch'e vignìs dute chê int a mangjâ lis balotis, si jere inviade a platâju te mede dal fen, dongje il poz, dapît dal bearz; lì al varès fate la bole e in câs di "viso aperto" de fínance nissun ju varès cjatâz. Passant denant da l'arie, tal slambri de lûs dal petrolio ch'e vignive fûr dal puarton metût in cop, 'e smicje dentri il voli.

 'E stavin finint la vore; difati la int no si viodevile, platade dal grum dai scus; e di chê altre bande si alzave la musse zale des panolis, un 'zal clâr, lusint, biel, come l'aur. Mie 'e veve sburtâz dentri tal fen i tre veris, plui in sù ch'e podeve, e cumò, cu la man plache, 'e cirive di uajâ la buse, quant che qualchidun la cjape par daûr strente strente e une man svelte j tapone la bocje... Al è stât un lamp.

Mie 'e rive a gjavâsi fûr une man e cun chê 'e sgrife là ch'e puès, ce ch'e cjate. J à parût che lis ongulis si fossin slungjadis, come chês dal gjat, e che par un moment 'e fossin jentradis in alc di tenar... Une rugnade rabiose e, subit dopo, talpadis che si slontanavin tal scûr jù pe braide. La domenie dopo, a misdì, dut il borc al saveve parceche Cristin di Deline nol jere stât a messe come ogni fieste cui amîs: un gjat j veve sgrifât, ben e no mâl, la muse.