Un scampul di prose (gjavât di "Cjase di Dalban")

 di Maria Forte

Siore Marzeline, si lementave dai doloruz che la cjapavin ogni tant e none Lise j diseve "Sint mo, fie,... la salût 'e je duc' chei pìzzui malans sopuartâz dì par dì... Vè coragjo!". Po, la viele 'e tornavesù, ma no j traeve masse il cûr di stâ cu la Carla. Il lôr fevelâsi al jere un butâ vôs cence rivoc. Ancje Fausto al scjampavejù dispes par restâ un pôc cul fradi, lì ch'a vevin vivût insieme, e par un pôc al taseve in lui ogni fastili.

 Lajù lui si smolave a mût so cence vê adues i vôi de femine. Chei vôi ch'a cjatavin simpri alc d'inturbiâsi. Fausto al cjapave in man polente e formadi e al gjoldeve chel mangjà, miôr di ce ch'al cjatave su la sô taule indarintade. Lajù dut j someave plui saurît; ancje il miluz smorseât a bocje,... come di frut, e insieme cul fradi al cjatave il timp passât.

Te sô cjase, invèzzit, dut al pareve imbalsamât, dut come un libri ancjmò di vierzi e... a' pesavin lis meneuzzis de Carla. Piês, al pesave chel malstâ inclapît fra di lôr e chel cidin ch'al innulave i spiei vecjos come un fum, e al fermave ogni slanz. Ma, vadì, ancje lis peràulis a' varessin fat compagn. Carla no rivave a stâ lontane de sô zitât... No rivave... e lui, invèzzit, al sperave, ancjmò, ch'e vignis a usâsi alì, te sô cjase, tal so paîs, cui custums di lui; ma a' vevin vût une zoventût e un vivi masse discompagn, e chel al segne par in vite.

Vadì, nancje il maridâsi no j veve confasût che j jerin vignudis canolis di crodi ch'a vessin vût di crevâsi ogni pôc e une vitine che cun tune pleade al sares stât dut finît. Une figure di disegnâ cun tune ponte sutile. None Lise 'e sares stade ben contente in chê cjase, cul bosc squasit parmis: ombre-cjarece, su la jerbe netade des menàdis salvàdiis.

D'istât cul prin flât di lûs, si sveavin lis vôs dai lens e 'a sveavin la cjase, e po, il soreli si tamesave a monedis e scribiz di àur sul muscli o si pojave a siarpis cjaldis su la schene de culine, e un lamp vert al jere il moto dal sborf. Biel in dutis lis stagjons il bosc! Ch'al svarìe ancje s'al stà fêr, e al è mistereôs e clâr tal stes timp.