Al è di tanton che si discut se le tradizion 'e jè in contrast cul progrès, se fevelâ furlan al sevi di limit tal imparâ el talian o, chesc' ains, l'inglês: fufignes! un modernisim sfuarcât, smentît dai faz. Bastarès cjalâ te Val Cjanâl tante int, fruz comprendûz, che san fevelâ talian, furlan, todesc e sclâf.

Grant risalt j àn dât i gjornai di chenti a Beppe Grillo a rivuart dai doi spetacui ch'al à fat a Udin, un pâr di setemanes fa. El personagjo al è di sigûr une gran sâgume, une vôre inteligjent; ch'al fas ridî ma ancje pensâ pes tantes questions ch'al denunce.

Ritignîlu, però, un guru o un profete... an passe! Tra les tantes ch'al à contades, al à ancje ridût su "marilenghe" o "innovazion", fasint capî che el Friûl al vares di sielgi le seconde, parceche, secont lui, e son dôs sieltes in contradizion tra di lôr. E chi al à mostrât di cognossi ben pôc le nestre tjere e le nestre storie: le nestre societât 'e jè seconde a ben pôs âtris, sepûr simpri leade ae sô lenghe e aes sôs tradizions; e tra i furlans and'è simpri stâz di ecelenz e precursôrs in duc' i setors, cence che vèdin scognût scancelâ les lôr lidrîs.

No sin denant a un cuisâ ce stravuelgiment... el mont no jè le prime volte che si "inove", ch'al è un fenomeno ciclic, che si ripropòn a periodos.

Sicheduncje, ancje se nô furlans 'j vin le pecje di fâ dispès i sotans, cirìn di miorâ, di no fâlu simpri;... e se propit 'j scognìn, almancul sielgin pal miôr: che nol ves di capitânus che par lâ daur di un che di mistîr al fâs ridi, ca di cualchi an no si cjatedin a scugnî vaî!