INDIETRO

Pronostic pal an 2000

Cjârs amîs, ca si presente
dal Doimîl la gran polente,
che cul spâli 'o tajarìn
par dî a duc' il so destin.
S'o veis fat qualchi pecjât,
pecjadon o pecjadut,
al è pront lu Jubileu
ch'al perdone propit dut.
Cence dî ni cèu ni bèu
il lidric al è mondât.
Ma al covente che si prei
e che il mâl si lu dinei.
A' si vièrgin puartis santis,
sei di Rome che Aquilèe,
e l'Italie a'nd'à ben tantis
par che il mont al fasi vèe.
Vin sigûr nol mancjarà
e un biel viodi e un bon mangjâ.
Strolegant cun mans e pîs
E cun formulis d'incjant,
di stagjons e mês e dîs
us comunichi l'implant.
Nol sdrondene il Teremot
ch'al è lât a bevi un got.
'E va in fèriis la Tampieste
cul seren metût par vieste.
Se l'Inviêr al glace i flums,
Primevere 'e disfe i grums.
'E saran avonde plois
vie pal an a nudrî rois.
Al è in vuàite fin il sut,
ma il so intent nol à costrut.
Stin atenz da la Canicule,
che no jè une cirignicule.
Se l'Atom al fâs judizi,
la vendeme no à caprizi.
Contadins, duncje sperait
che la blave le salvais.
Pal Doimîl al sarà bon
vueli D. O. C. di comedon,

no vint plantis di banane

che nus dan tal jet la mane.

Il turisim al va miôr,

co tal mâr no còlin bombis.

Pai ambienz d'ogni lavôr

'e àn ben pôc ce sunâ trombis.

L'Euro al è une grande scuse

par gjavâti piel e gruse.

E, cjalant l'ecunumie,

si viôt masse cormanie.

Il Friûl si drece a planc,

ma j covente un pôc plui sanc.

Cui foresc' no si à di crodi

al mont nestri di proviodi.

'O vin Fede, 'o vin culture,

ch'e jé nestre di nature.

'E jé un cont la caritât,

âtri il cedi a iniquitât.

Simpri plui cun nons inglês

i locâi furlans 'e son.

Se sotans dal dut no sês,

salvait lenghe e tradizion.

I Furlans ch'e son pal mont,

sitadins d'ogni nazion,

te lôr Patrie 'e àn di vê il pont,

chê dai vons, par tignî union.

I eletôrs cul pindulin

'e laran a cirî un cjâf

di pulitic ch'al sei fin,

mancul stramp, missete o 'zâf.

Nus àn fat viodi la lune,

jo us fâs viodi la fortune.

Anìn calms tal tierc mileni,

che l'uman nol mude stîl.

Stin contenz che Diu nus meni

par chêi trois ch'e van in Cîl.

'O varìn tante salût

e, sperìn, majôr virtût.

Mandi, amîs dal Belandant,