LEJENDIS DI URSININS E DE SÔ INT 

Le agne Agjeline si impense di ce che i contave sô none Anzule (Angela Piuzzo), ch'e e jere nassude tal 1852 e muarte tal 1935. Le agne si sentave dongje di jè, suntun scagnut e le scoltave par oris, inzusside. Une volte i à contât dal troi ch'al è daûr dal simiteri di San Bortul, dulà che son parôns chei di Cost di Ursinins Pizzul.

E diseve che su chel troi al ere passât Sant'Antoni, quanche al leve a Glemone. Le agne si impense dal troi e de sudizion ch'e veve a cjaminâ parsôre. Nancje quant che levin a cjstinis no olsavin a metî parsôre i pîs. Sô none Anzule 'e diseve ancje ch'e veve simpri cun sè l'Orgul. Po dasi che al sedi stât un sbilf, che i leve daûr sot forme di dindi quanche ere fûr di cjase, e sot forme di glimuz quanche si sentave. E contave ancje che i tabajave e i tignive compagnie. Simpri Anzule, le none de agne Angjeline, 'e contave che une volte a Tarcint 'e iere ientrade in tune ostariute par cjoli alc di mangjâ.

'E veve unevôre di fan 'e cussì 'e ordenà une fete di polente e un toc di salam, po si sentà su le bancje, dongje dal fogolâr. I aventôrs le cjalavin, e riduzzavin e tasevin, ma je no faseve câs. Di un moment a chel âtri, intant ch'e mangjave di gust, 'e sintì un sbuf di ajar e une sivilade lizere vignî dal fogolâr 'e tun colp dute le cinîse 'e vignì intôr di je. Nome dopo 'e à savût che propit lì al ere stât esorcizât un danât.

(Raccolte da Rodolfo Tondo, della scuola "Alessandro Manzoni", presso la zia Angelina Giordani, nata nel 1913)