Par capi ben il significât storic dal prin document scrit ch'al nomene Buje 'o scugnìn tignî cont prin di dut de situazion dal Frûzl e da l'Europe a la fin dal secul VIII (1).

'O sin, duncje, dal 792. La sene politiche europee 'e je dominale de figure dal re di France, Carli, il futûr imperadôr ch'al passarà ae storie cul non di "Grant" (Magno).

Dal 768 al veve ereditât il regno di so pari, Pipin, un re savi e energjc, ch'al veve fat de France il stât-guide di duc' i gnûfs regnos barbarica. Dal 773, dopo vê vinzût a Pavie il re dai Langobarz Desideri, al ere deventât re d'Italie. Dal 775 al veve batûz e metûz sot i Sassons. Dal 776 al veve scjafojade sul nassi la ribelion dal duche dal Friûl, Rotgaut, ch'al veve cirût di ristabili la paronance dai Langobarz in Italie. Dal 790 al veve metude sot il so podê dute l'Istrie, intant che il fi Pipin al veve conquistale la Panonie batint i Avars e i Slafs.

Intant la rinassite culturâl dai paîs di Soreliamont, che lui al veve inviade (fondant scuelis, monastîrs e academiis), 'e veve cjapât pît di ogni bande cun risultâz di prin ordin, massime tal cjamp artistic.

La buine armonie che Carli al veve stabilide cul Pape e cu la Glesie catoliche in gjenerâl 'e concoreve infin ae unificazion ancje morâl dai popui d'Europa, parsore des divisions creadis dai regnos etnica barbarica. Propit par sanâ une situazion ch'e riscjave di crevâ ché unitât slargiant une gnove eresie adozianiste nassude qualchi an prime in Spagne, il re Carli al decit di convocâ tal 792 a Regensburg une sinode dai vescui europeans par ch'e decidin su la question.

Par chei, 'za sot Nadâl dal 791, Carli al va te citât bavarese su la Donau, dulà che si fermarà fin te sierade dal an dopo. La sinode 'e je stade celebrale dopo lis fiestis di Pasche dal 792, cun grant concors di vescui (2). Fra chei vescui al jere presint ancje il Patriarcje di Aquilee, il furlan Paulin. Anzit, lui al jere un dai plui autorevui, sedi pe sô cariche di metropolit di une grandissime provincie glesiastiche, sedi pe sô grande culture teologjche, sedi pe sô amicizie personal cul re Carli.

Propit lui, il re, dal 776 al veve volût che il predi di Premariâs, Paulin, che in chê volte al jere mestri di retoriche tes scuelis di Cividat, al jentras te Academie palatine di Aachen (Aquisigrana) dulà ch'al veve tiraz dongje i omps plui studiâz di dute Europe. E propit lui, il re, al veve volût, dis anns dopo, ae muart di Sigualt, che Paulin al deventas Patriarcje di Aquilee (3).

Paulin al jere ancjmò a Regensburg sul prin dal astât dal 792, quant ch'al profità des circostanzis par domandâj al re pe sô Glesie di Aquilee qualchi plasê ch'al servis a tornâ a meti pâs in Friûl fra Langobarz e la int dal puest, fra i gnûfs sorestanz francs (il duche Eric, i funzionaris de sô cort, i uficiai e i soldâz ch'e vevin cjapât posses dai cjscjei atôr pe regjon) e la vecje classe dirigjent spodestade, fra il Stât carolin e la Glesie furlane (4).

In efiez, il 4 d'avost il re Carli a Regensburg al firme doi decrez impuartanz a favôr di Paulin e de sô Glesie, ch'e daràn une plee gnove a dute la storie dal Friûl di lì indenant (5).

Cul prin diplom Carli al torne al Cjapitul di Aquilee il dirit di sielgi liberamentri il Patriarcje e al concêt l'esenzion des tassis a duc' i sudiz (homines servientesque) de Glesie d'Aquilee. Cul secont al conferme ae stesse Glesie dutis lis proprietàz ch'e veve vût par antic di rea o duchis langobarz e al trasferis sui territoris di chês proprietâz l'imunitât (emunitas), valadî la sotrazion da ogni autoritât dai funzionaris dal re.

Di lì indenant nissun impiegât statâl al pò jentrâ tea proprietâz dal Patriarcje e de Glesie aquileiese par scuedi tassis, par fâ justizie, par imponi az aministratîfs. Chestis competencis 'e passin al Patriarcje che lis esercite par miez di un so rapresentant, il gastalt (6).

Chest secont document al è chel ch'al riuarde Buje, parceche fra lis proprietâz 'za regaladis 'e je nomenade ancje la Plêf di San Laurinz di Buje cunt dut il so teritori. Ma chi 'e comencin lis dificoltâz di ordin diplomatic, ven a stâj dipendentis de nature dal document ch'o vin uê, dopo 1200 ains dal fat. Nome dal prin diplom, infaz, si è tramandât intat il test origjnari; dal secont, invezit, 'o vin une copie nordaril dal 1195. Cheste copie, che comò si cjate tal Archivi comunâl di Udin in dipuesit te Biblioteche civiche (une pergamene in stâz di conservazion pluitost precaris), 'e je stade fate "in Aquileiensi palacio", denant di cinc testemonis, il 2 di dicembar di chel an, dal "imperialis Notarius" Pieri, "nil addens ven minuens", cence 'zontâ o cjoli nuje (7).

Fin al principi dal nestri secul nissum storic ch'al vedi studiât chel document al à vût dubis su la sô autenticitât (dal De Rubeis tal 1740 al Paschini tal 1906) (8).

Ma quant che dal 1906 al è vignût fûr il prin volum dai Diplomata Karolinorum te colezion dai Monumenta Germanie Historica cu la edizion critiche dal diplom conservât te biblioteche di Udin al è sclopât il scandul. Il test al risultave "interpolât", valadi modificât posteriormentri in diversis parz!

No te date (4 di avost dal 792), no te sotscrizion (Signum Karoli), no te concession gjeneriche de imunitât, ma te intitulazion (dulà che Carli al è clamât "imperadôr" quant ch'al ere ancjmò nome re) e soredut te part centrâl, là ch'e vegnin indicadis "specialiter" tre proprietâz ch'e vevin di sei cjapadis dentri te gnove imunitàt, ven a stâj: il munistir di S. Marie in Organo di Verone, il senodochi di S. 'Zuan di Cividât e la "ecclesia Sancti Laurentii quae sita est in Foroiuli loco qui nuncupatur Boga", tantadi la Plêf di San Laurinz ch'e si cjate a sei in Friûl tal luc clamàt Buje (9).

L'editôr dai Monumenta al mutive chestis interpolazions prin di dut cul stil dal test, che in chef ponz nol è plui chel sut e tecnic usât te cancelerie caroline dal VIII secul, ma chel plui florit vignût di mode sot il 1000; secondariamentri cul fat che il munistir di Verone ancjmò dal 889 al risultares libar (e nome dal 996 si à une conferme sigure ch'al jere passât sot la paronance patriarcjâl).

Chest ultin argoment nol è paraltri sigûr; "al pâr" (scheint es), al dîs onestamentri il studiôs. Duncje no si pò escludi cun sigurece che il munistir di S. Marie in Organo al sedi efetivamentri 'za stât regalât ae Glesie di Aquilee di qualchi re o duche langobart.

Par chel ch'al riuarde Buie, une conferme de donazion de sô Plêf al Patriarcje si àle dal 983, quant che l'imperadôr Oton II, confermant la proprietât, i trasferis al Patriarcje Rodoalt la plene iurisdizion (imunitas maior) su "quinque castella quae propria ípsius ecclesiae sunt: Buga..." (e dentri des muris dal "castellum" 'e jere ancje la Plêf) (10).

Ma, ancje acetant che il document originari di Carli il Grant al sedi stât interpolât posteriormentri, si scuen osserva a chest pont che si trate:

a) di une 'zonte unevore antighe (sigûr fate prime dal 1000; tant al é vêr che dal 1195 il nadâr e i cinc testemonis, leint la pergamene ch'e àn copiade "nil addens vel minues", no vevin nissun dubi che si tratas di un "authenticum Domini Caroli Magni Regis");

b) di une 'zonte di chês che i specialisc' 'e clàmin "di modernizazion" e che no gambìin la sostanze dal document. Chestis 'e son "interpolazions" destinadis nome a rindi plui clar ce che tal document originari al è dit in forme gjeneriche, a rindi esplicit ce ch'al è dit in forme inplicite. Tal nestri document, duncje, al jere dit in forme gjeneriche che Carli al dave l'imunitât a duc' chef lucs (munistîs, ospedai, plêfs) che il Patriarcje al veve vût in regâl di res e duchis langobarz.

L'interpoladôr alore al precise che fra chei lucs 'e jerin cjapaz dentri ancje il munistir di Verone, l'ospedal di Cividat e la Plêf di Buie. Cun chest lui nol 'zonte nuje di gnûf par chel ch'al riuarde la sostanze de concession caroline (i teritoris metûz sot l'imunitâ), la rint nome plui clare pai letors dal so timp (che naturalmentri indi vevin qualchi precis interes).

In conclusion, la interpolazion dal diplom dal 792 ch'al riuarde Buie 'e parten a un "tipo ben noto", al scrif un specialist come Reinhardt Härtel. "Documenti di questo tipo - al va indenant - sono falsificazioni solo in senso diplomatico; storicamente, tuttavia, essi devono ritenersi credibili ed accettabili dalla critica storica" (11).

Il document in question al risulte, duncje, dal dut autentic te só sostanze e modificât nome te sô forme redazional e leterarie. Qual jsal alore il significât particulâr dal diplom carolin dal 4 di avost dal 792 pe storie di Buie?

La rispueste 'e podares jessi metude in struc cun chesc' cinc ponz:

1. Il diplom carolin dal 792 al è in assolût il plui antic document scrit ch'al vedi un riferiment esplicit ae storie di Buie.

2. Il diplom soredit nus dà un'altre testemoniance de forme antighe dal non di Buie: Boga, prime dal 1000 (le seconde 'e je ché dal 983: Buga); si trate di un toponim (non di luc) derivat di une lidris indoeuropee, ch'e significhe buse, valade tra dôs monz (forsi "Pidicuel" tra i Praviz e Mont dulà ch'al sta individuât un insediament neolitic, il plui antic di Buje).

3. Il diplom soredit nus dà la notizie sigure plui antiche su la Plêf di San Laurinz in Mont di Buje (e su dutis lis Plêfs dal Friûl).

4. Dal diplom soredit al risulte che 'za prin dal 792 la Plêf di Buje cun dut il so teritori lenti atôr 'e jere stade regalade ae Glesie di Aquilee di qualchi re o duche langobart (cun tune vore di probabilitât te prime metât dal VIII secul); si pò, duncje, pensâ che la sâ fondazion 'e sedi vignude unevore prin.

5. Su la fonde di chest diplom, dal 792 indenant, la Plêf di Buje cul so teritori 'e jentre tal sistem imunitari de Glesie di Aquilee, dulà che nissun funzionari statâl al pò là dentri par scuedi tassis, ministrâ la justizie, fâ az istituzionai; chestis competencis lis à il Patriarcje che lis esercite par miez dal so gastalt. Cussì la "gastaldie" di Buje 'e ven a costitui un dai prins lucs de sovranitât temporâl dal Patriarcje che, cul là dai secui prime dal 1000, 'e vignarà a cjapâ dentri dut il Friûl. Chest si verificarà definitivamentri dal 1077, quant che l'imperadôr Indrì IV al fondarâ il Stât furlan, metinlu tes mans dal Patriarcje Sigeart.

Par chestis cinc resons fondamentals il document dal 792 al rapresente un riferiment critic capitâl pe storie antighe di Buje ch'al è ben tigni vif te memorie de nestre comunitât, come ch'al è stât par mil e dusinte ains (12)!

Note:

(1) Un prin scandai su la situazion dal Friûl ae fin dal VIII secul si cjatilu in: G.C. MENIS, Storia del Friuli, Udine 1990, 144ss.; C. G. MOR, Dal ducato longobardo del Friuli alla marca franca: Memorie Storiche Forogiuliesi 42 (1956-57) 29-41; su la situazion taliane simpri util consultâ un classic come: G. VOLPE, Il Medioevo, Firenze 1969, 101ss.; par une cognossince no impegnative di Carli il Grant e dal so timp si pò lei il libri dal furlan G. GRANZOTTO, Carlo Magno, Milano 1978.

(2) Sul adozianisim e su la sinode dal 792 cfr. E. EWIG, Lotta iconoclasta, adozianismo...: Storia della Chiesa diretta da H. Jedin. Il primo Medioevo, Milano 1978, 104ss.

(3) Fondamental 'e je ancjmò su la vite dal Patriarcje Paulin l'opare di P. PASCHINI, San Paolino Patriarca (+ 802) e la Chiesa aquileiese alla fine dell'VIII secolo, Udine 1906. Par qualchi azornament si pò viodi: Atti del Convegno internazionale di studio su Paolino d'Aquileia, Udine 1988.

(4) "La repressione di Carlo fu assai più severa di quello che sembrino accennare le fonti indicate (Eginardo, Annales Laurisenses). Oltre che fu tolto ai duchi longobardi il governo delle città e del relativo territorio ducale, il quale fu assegnato ai conti scelti dalla nazione franca, abbiamo sufficienti indizi per provare che si usarono mezzi repressivi anche contro le persone. Ci resta anzitutto una lettera che Sigualdo diresse a Carlo Magno; sebbene mutila ci manifesta come Sigualdo ammonisse Carlo di rispettare i canoni ed i precetti ecclesiastici e di curare il vantaggio della Chiesa. Il principe doveva ben badare di entrare nella Chiesa non con superbia ma con umiltà; e doveva guardarsi dal contaminarla e dall'opprimerla con usurpazioni... Abbiamo poi il fatto di Arichis, fratello di Paolo Diacono... imprigionato assieme ad altri connazionali in Francia... Ci è stata confiscata (scrive Paolo) quella poca sostanza che avevamo... e siamo equiparati ai servi della gleba... Se la famiglia di Paolo, che pure non era fra le più illustri e potenti, fu così duramente e lungamente colpita, certo altre ancora si trovarono in eguali condizioni. Al fisco furono aggiudicati i possessi di Waldano da Lavariano, perito con Rotgaudo, e quelli dei fratelli... Aione cercò rifugio fra gli Avari..." P. PASCHINI, Le vicende politiche e religiose del territorio friulano da Costantino a Carlo Magno: Memorie Storiche Forogiuliesi 9 (1913) 5s.

(5) P. PASCHINI, Storia del Friuli, Udine 1975, 153s.

(6) MGH Die Urkunden der Karolinger. Erster Band bearbeitet von Engelbert Muhlbacher, Berlin 1956, nn. 174, 175.

(7) "Exemplum authenticum Domini Caroli Magni Romanorum Imperatoris, actum in Aquilegjensi Palatio, anno Domini Millesimo centesimo nonagesimo quinto, secundo die mensis Decembris, Indictione tertiadecima... Authenticum Caroli Magni Regis. Magister Ubaldus, D. Renardus et Petrus Aquilegjenses Canonici, necnon Vincentius Sacerdos ac Dominicus Diaconus ad audiendum authenticum D. Caroli Magni Regis et hoc eius exemplum interfuerunt et huius rei rogati sunt testes. Ego Petrus Imperialis Notarius, ut vidi in authentico D. Caroli Magni, ita transcripsi nil addens vel minues quod Sententiam mutare". B. DE RUBEIS, Monumenta Ecclesiae Aquileiensis, Venezia 1740, 383.

(8) B.M. DE RUBEIS, ibid.; CAPPELLETTI, Chiese d'Italia 8, 102; C. GIANNONI, Paulinus... 82; SICKEL, Acta... II, 271; V. IOPPI, Il castello di Buia ed i suoi Statuti, Udine 1877, 7; KANDLER, Codice diplomatico istriano; B.M. DE RUBEIS, Dissertat. variae eruditionis; P. PASCHINI, San Paolino... cit. 85.

(9) P. PASCHINI, Storia... cit. 154; ID., Le vicende... cit. 11; H. SCHMIDINGER, Patriarch und Landesherr, Graz-Koln 1954, 23.

(10) MGH Die Urkunden... cit. 235.

(11) R. HARTEL, I documenti de Patriarca Poppone...: Il Friuli dagli Ottoni agli Hobenstaufen, Udine 1983, 51. Cussì la pensavin ancje dal 1942, quant che la Comunitat di Buje, seben che la seconde uere mondiâl 'e ardeve 'za di ogni bande, 'e à volût distes fa une grande fieste per ricuarda il 1150° aniversari dal document dal 792. Tal manifest publicât in ché circostanze si dis che "l'eco di questo avvenimento è giunto fino a noi, dopo tante generazioni, come un retaggio di nobiltà". Il moment centrâl des manifestazions organizadis di un Comitât, che si ere formât par chel, al è stât il 18 di otobar. In ché dì, denant misdì, l'Arcivescul di Udín Nogara durant il pontificâl tal domo di S. Scjefin al à comemorât l'aveniment, metint in lûs il significât civîl e religjôs, storic e atuâl dal fat. Dopo misdì, su la place di San Scjefin, sot la direzion dal mestri Vigj Garzoni, concert di une corâl feminîl di 200 elemenz formade cui grops de GIL di Magnan, Majan, Muez, Osóf, Pinzan, Tarcint, Trep, San Denêl e Venzon. Pe prime volte al è stât eseguit il "Ciant di Buie", componût pe ocasion dal mestri Garzoni. Une sdrume di int 'e jemplave la place in gjonde. La stampe regjonâl 'e è dât grant risalt ae fieste te cronache locâl. Pe circostanze al è stât ancje stampat il libri di P. Menis, Buia e il suo duomo (la prime storie dal paîs) e 'e je stade fondude une medae di Matiute Monassi, ch'e rapresente sul dret une tore cu la cjadene e la scrite "cincta floret" e sul ledrôs une pergamene cui document dal 792 e la steme di Buje; lis scritis lis è detadis mons. josef Vale, bibliotecari arcivescovil di Udin. A chest proposit 'e vai la pene di riferî ce ch'al scrîf il Vale a Pieri Menis par spiegâ il significât des scritis. "Cincta floret = incatenata fiorisce. Buja fu sempre soggetta ai signori del suo castello... Ciò non ostante fiorì e fiorisce per le opere dei suoi figli animati da fede in Dio e d'amore alla loro zolla. Fioritura d'agricoltura, d'arte, d'attività economica, d'opere di religione e di carità..." (28.1.1942). "Sulla pergamena spiegata si potrebbe scrivere semplicemente così: Karolus Imperator - Paulino Patriarchae - DCCXCII - Plebem Buiae - d.d. L'editor dei Diplomata Karolina... dice che il documento di conferma dei possessi al patr. Paolino è giunto a noi non senza interpolazioni e tali sono particolarmente: la chiesa di S. Lorenzo di Buia ecc. La medaglia consacrerebbe l'interpolazione e smentirebbe il critico tedesco..." (20.4.1942)!