III

Quod annuatim eligatur Massarius in hac Comunitate

Statuerunt et ordinaverunt quod annuatim tempore Nativitatis Domini Nostri Iesu Christi congregetur Consilium XXIV ut moris est, qui eligere et deputare debeat novum Massarium ex hominibus et Vicinis huius Comunitatis qui sit bone fame et conditionis prout placuerit majori parti ipsorum eligentium, qui novus Massarius sic electus et deputatus teneatur et debeat exercere officium et in se assumere sub pena Marcharum denariorum X Aquilegensium applicandorum medium Ven. Ecclesie D.Laurentii Titularis, et aliud DD. Consiliariis et in sua vice substituatur suis damnis et expensis ac interesse alius Massarius, remoto quocumque excogitabili pretextu, exemptione aut privilegio.

Teneatur insuper dictus Massarius novus sic electus et confirmatus statim in manibus veteris Massarii in dicto Consilio iurare ad Sanctum Domini Evangelium manu tactis Scripturis, quod officium Massariatus sui, sic et fideliter faciet, et pro suo scitu iustitiam faciet et administrabit pro posse suo et quod iura et laudabiles consuetudines et statuta ipsius Comunitatis Buje conservabit in honorem et utilitatem ipsius Comunitatis, remoto omni dolo, fraude et amore.