'O VOLTI A ZAMPE

Note dal autôr

La vite 'e jè fate di mil robis, bielis e brutis, tragjchis e ridiculis, legris o dolorosis; chel che nus jude a paidîlis e a sapuartâlis, une vore di voltis, al è il sens dal umorisim che duc', ce plui, ce mancul, 'o vin dentri di nô, magari clupît in cualchi scosagn cjanton dal nestri jessi.
Alore, fasint cont sun chest sens cussì simpatic che nus da jutori a passâ parsore di tanc' câs ledrôs ch'o intivìn lunc-vie de nestre esistence, 'o ai scrit cheste rieste di barzaletis che no a pratesis ni poetichis ni leterariis e ch'e vares, invecit, voe di fâj fâ al letôr cualchi miege riduzzade.
Lis barzaletis a' son chês che si sintilis tes ostariis, nome che, tant par mudâ regjstri, 'o ai cirût di dâlis dongje in rime. Cualchidune 'e cîr di sei une pizzule satarute di custum, o un velât mutivâ critic a la vite di ogni dì, cence, paraltri, vê la presunzion di insegnâ a vivi a di nissun, ma nome cu la sperance di rivâ a fâj fâ une riduzzade e a fâlu disludâ par un moment dai siei pinsîrs, a cualchidun ch'al è jevât cu la lune ledrose.