Scherz

'Ne dì, par controlâ,

Diu, su la tiere al mande

san Pieri par ch'al viodi

cemût ch'e va la ande.

Pieri, tornant in cîl,

no j puarte novitâz

e j dîs che su la tiere

i umign no son mudâz

e j fâs viodi un cine

ch'al mostre i minadôrs

stracs, sfigurâz, scunîz

di miserie e lavôr.

" Chest lu vês dite Vô,

- j dîs Pieri al Signôr -

ch'a scugnivin cuistâsi

il pan cul lôr sudôr! "

" Sì, sì, ma jo o scherzavi,

fevelant di fature,

no intindevi mai plui

'ne vite cussì dure! "

Po Pieri j mostre un cine

sui nostrans gardenâi,

sprofumâz ben vistûz,

lontans di duc' i mâi.

" Cui sono chei chi, Pieri,

cussì passûz e frescs? "

" Chesc', Signôr, a' son chei

ch'ai àn capît il scherz! "