“Je suis l’Immaculée Conception”. Cussì e disè le Madone a Bernadette Soubirous in tes aparizions dal 1858 a Lourdes. Cuatri ains prime, tal 1854, el Pape Pio IX al veve emanât el dogme ch’al confermave cheste veretât di fede e al istituive le fieste de Inmacolade di festegjâ ai 8 di dicembar.

Chei di Madone, tal 1954, e an pensât di ricuardâ in grant el prin centenari di cheste fieste e cussì dai 27 di novembar ai 5 di dicembar le preziose statue, che rapresente le Madone dal Miluç, e jé stade puartade in prucissiòn par dute Buje: Codês, Belvedere, glesie di Urbignà, pravilegjo di Urbignà, Madone, Saramont, Cjamp, Salèts, glesie di Tombe, San Floreàn, Sacastoe (Cjà Briant), Cjandàne, Dòbes, Mont, Cjamartìn, Strambòns, Asilo di San Scjefin, Marcjât, glesie dal Sacro Cûr, Sacuèl, Ontegnàn, Vile, Andreuce, ancjemò Vile, Tonçolàn, Pasc, strade di Mels, Ursinins Grand, Crist di Cjarvà, Sale, Colosomàn, Còcule, Place dal Municipi, domo di San Scjefin. Domenie ai 5 di dicembar messe in tierç e pontificâl in domo cul Vicjari Gjenerâl mons. Comelli, corteo con ducj i predis di Buje e les dôs bandes di Buje, e po jù par Darìul fin a Madone, là ch’e rive aes quatri daspò misdì. (1)

Cinquant’ains dopo, val a dî ai 5 di dicembar dal 2004, chest aveniment si è ripetût, in maniere ridote, e le statue e jè stade fate girâ pes contrades di Madone: Pasch, Cjamp, Saramont, Solaris, Codês, Asilo di Madone. Partîz dopo messe grande e rientrâz di soresere. Mons. Emidio Goi al è stât simpri presint e al à predicjât in ogni tape, di sere funzion conclusive cun mons. Nino Rivetti e don Daniele Calligaris.

I doi aveniments e son stâz documentâz dal 1954 di Tarcisio e Alvio Baldassi e dal 2004 di Egidio Tessaro e Franco Guerra. Les fotos e pàndin i grancj gambiaments tecnologjics, sociâi e di custum vignûts in mieç secul: les fotografies e jerin in blanc e neri fates cule pelicule, cumò a colôrs in formât digitâl; el mieç di traspuart de statue al ere un cjâr tirât di un tratôr e cumò un pick-up gjaponês; el paîs nol è pui chel, dal dut gambiât dopo dal taramot dal 1976. Ma soredùt e son el spieli di une comunitât che di contadine, rurâl, catoliche, ritualiste e jè deventade post-moderne, post-cristiane, sincretistiche, omologade, refratarie ai rîts religjôs salvo cuant che si trate di lâ a San Bortul o tal Picêt.

Chestes considerazions mi puartin a pensâ: ca di cinquant’ains, dal 2054, ce tipo di societât varino? saraial ancjemò cualchidùn ch’al puartarà atôr le statue? o le Madone scugnarae lâ atôr dibessole par mieç di un argagn eletronic a guide satelitâr e magari dute tabarossade cun tun burka “par rispietâ e no disturbâ” chei che le pènsin o cròdin in maniere diferente?

note:

1. Bollettino Parrocchiale della Pieve Arcipretale di Buia - Febbraio 1955.