A mê Mari

Done mari,

cheste volte mi è saltade la moscje di dâus il “bon an” su pal sfuei: no s’e vês purnò par mâl! E us al doi cun dut il cûr e l’afiet di un fi che nol è plui un frut e che s’impense e al sa misurâ dut ce ch’al à vût di Vô.

No mi vês dadis lis comoditâts e i contents dai siôrs ni i figoteçs des miegis veladis, ni il velen e la grinte dai pùars invidiôs e bogns di nuje.

Mi vês tirât sù cence fotis, cence sberlis e cence ca­priçs; mi vês fat deventâ un omp ch’al sa lâ pe sô strade e un furlan che nol bastarde la sô raze.

Di dut chest us varai agrât fintremai ch’o varai flât.

E us ài agrât ancje di tantis robutis che putròs di lôr no san avonde stimâ: di vêmi metût non Meni e no Lidio o Melampo, di vêmi insegnât a fevelâ par furlan e no par slimi, di vêmi nudrît in libertât e no sot di une cjampane di veri, di vêmi industriât a lavorâ e no a fâ il bulat, di vêmi lassât cressi pluitost ruspi che no lecât, di vêmi usât a cjalâ i fats e no lis peraulis, a cjalâmi denant e no a cjaminâ a vuarb.

E nol conte nuje se cualchi volte o sponğ, s’o trussi, se j pescj la code a cui che le striscine, se j doi di comedon a cui ch’al cîr di intardâmi o di imbolognâmi o di imbussulâmi: al conte unevore ch’o vedi cjapade une dreture, une sgrimie, une volontât di cori su lis scinis dal just e dal vêr; al conte unevore che nissun nol vedi ancjemò podût comprâmi a bon presi, ni fâmi mudâ gabane, ni cjapâmi in cjastine, ni butâmi in ghigne une carognarìe.

Di’ lu vueli che mi basti simpri la fuarce di vivi come che Vô mi vês instradât, parcè che cualchi volte si sclope, cun tante morcje ch’a ven tai pîs...

Cumò o ài une sole brame e une sole ambizion: chê di rivâ adore di fâ cu la mê canae ce ch’o vês savût fâ Vô cun me e cun miei fradis.

Par intant no mi lementi; ma il gno grandat mi pâr che si lassi un pôc sglonfâ i budiej di peraulonis e di bùfulis. A sarà la scuele, a sarà la clime stonfade di comediis che il sciroc nus mene sù; ma des caloradis Vô mi vuarivis cunt’une purghe, e il fi di gno pari al intind di fâ compagn.

Bon an, done mari: in salût e, Di’ vueli, in sante pâs.

O vignarai a cjatâus plui dispès ch’o podarai, che ogni volte che mi gjavi di chest cjalderon di citât, mi pâr di ricreâmi e di tornâ gnûv.

A riviodisi in curt.

 __________________