Marie Forte

Il fírmament leterari furlan dal secont dopo-vuere al è stât risclarât di tanc' lusôrs. Tra chesc' un puest impuartant j spiete a Marie Forte (1899-1979), une scritore che cu la sô puisie e la sô prose 'e à contribuît a insiorâ lis nestris letaris. La prose, in particulâr, 'e je ajarose, 'e côr vie cjantant, fasint tornâ a vivi peraulis smenteadis e, juste par chel, gnovis resintis. 

La capacitât di cheste autore di jentrâ tes pleis, tai rices plui scuindûz de anime dai soi protagonisc', j permet di disegnâ e rindi cun intesitât personis, faz e lûcs. La Forte 'e veve la vocazion par contâ, 'e rivave a supâ e spiritualizâ il mont ch'e veve atorvie e, dopo filtrât, lu pandeve tra realtât e fantasie, insiorât cun sintimenz di grande umanetât. Leint i soi tesc' si puedin scuviargi no dome chês vôs nostranis conservadis te memorie de autore, ma ancje un stîl espositîf armoniôs, fat no comun tal furlan. 

Marie Forte 'e jere nassude a Buje e tal so paîs 'e veve fat la mestre elementâr fintrimai al 1964, an ch'e jere lade in pension. 'E veve scomenzât a fâsi cognossi come poetesse, scrivint puisiis dulà ch'e pandeve il so amôr pal mont ch'e veve dulintôr, fat di vert e di flôrs, di cuelinis e di cjampanis, di ricuarz e sintimenz, une puisie là che s'impâr un sintî delicât e un'anime puartade viars il biel, il ben. 

Tre i libris di puisiis publicâz: "Timp pierdût" dal 1949, pes edizions de Coop. tip. di Buje; "Vôs disdivore" dal 1961, par cure di Risultive e cu la presentazion di L. Cjanton; "Peraulis", Rome 1965, cun presentazion di M. Dell'Arco. Ma al è te prose che Marie Forte 'e palese grande vocazion. 'Za tai prins doi lit>ris di contis, e daspò te plui impegnative prove dai romanz, 'e pant grant vivôr e, come 'za menzionât, introspezion tal "jentrâ" tai soi protagonisc, là che "... ogni slambri di prose, ogni pagjne, 'e je vitâl e coerent come une frazion di un cuarp vîf... ", come ch'e à scrit Andreine Ciceri. Une prose poetiche palesade sence colâ tal patetic, "... sence dividi i bogn dai trisc'" e sustignude di une tension simpri presinte, tâl che, une volte scomenzade la leture, si à voe di rivâ fin in somp. 

Dal '52 la Forte 'e je jentrade a fâ part di "Risultive", un moviment culturâl nassût dal '49 e ch'al à vût come santul Josef Marchet. Risultive 'e à puartât un grant rinovament te puisie e te prose furlane, sperimentant ancje la gnove koinè che il stes Marchet al veve screât dal '46 su la "Patrie dal Friûl", un model grafic che daspò al vignarà doprât di unevore di poez e scritôrs.

 L'indiriz culturâl di Risultive al veve cjatât la plene adesion de autore di Buje e in chel grop leterari la Forte 'e puartarà il so contribût di cognossince e di amôr pes nestris letaris. Il prin libri di contis, "Cja' Dreôr", al è stât publicât de S. F. F. dal '67 e al puarte une note introdutive di A. Ciceri; il secont libri, "Cja' Fors", simpri de Filologjche, al è dal 70 e ancje chel al à une pizzule presentazion de prof. Ciceri, ch'e je ancje la fie de autore. Te part finâl di cheste publicazion si cjate un util glossariut ch'al jude il letôr a capî il signifícât di certis peraulis o formis idiomatichis, che magari 'a jerin coladis in disméntie e che la Forte 'e torne a fâ vivi. 

Dopo l'esperience fate cu lis contis, la Forte 'e à frontât il romanz e il prin ch'e à scrit al è stât "Cjase di Dalban", che dal 72 al vignarà publicât de S. F. F., stant ch'al veve vinzût il prin premi tal concors bandît de Filologiche dal 71. Cheste la mutivazion de jurie: "Si trate di un afresc dulà ch'a cjàpin rilêf momenz e situazions particulârs dal paisaz uman e fisic. Une fuarte figure di femine furlane 'e fâs di fîl condutôr 'es vicendis storichis ch'a travànin il romanz, e ch'a rìvin a momenz di inten sitât poetiche. Il lengaz, in particulâr, al è scorevul e cun fuartis caraterizazions". 

Une storie che si displee e si slargje par contâ la vicende secolâr di une famee leade ai valôrs de tradizion e incentrade su la figure di une femine salde e pazient, che par amôr dai siei di cjase 'e fronte fin ae colme la strade de vite che si disglagne tra gjondis e dolôrs, marums e conturbiis. "Cjase de Dalban" al à vût une ristampe dal '84, curade di Chiandet pe colane "Forum Julii". Il secont romanz, dal titul "La tiere di Lansing", al conte lis vicendis di 'Zuan, fornasîr prime e capuzzat dopo, par agnorums lavoradôr stagjonâl tune fornâs di Lansing, in Baviere.

 La sô aspirazion 'e jere chê di ingrumâ palanchis di mandâ ae femine par fâ sù la cjase tune biele braide dal so paîs, dulà che so pari al veve strussiât la vite come sotan. Il paron de fornâs al veve fiducie plene di 'Zuan, un om pratic dal mistîr e ch'al saveve tratâ cui lavorenz, sichè, cu lis palanchis ch'al cjapave e ch'al mandave ae femine, dopo un pôc la cjase 'e jere rivade ae colme. E di chê strade al jere rivât ancje a sfrancjâsi de sô vite sclagne, al pont che la int dal paîs, co al tornave, lu tignive in cunsiderazion. 

Ma dut chest no j ere bastât, parceche tornât stabil a cjase, une ploe di pinsîrs e ricuarz, insieme a un segret rimuars, lu vevin strassomeât, gambiât, al pont che al passave 'zornadis interiis miez incuchît e stranît dal so mont. "La tiere di Lansing" al è stât publicât dal 74 pes edizions di Tarantola-Tavoschi di Udin e cu la prefazion di Elio Bartolini. Ancje chest libri al ripuarte tes ultimis pagjnis un glossariut ch'al sarà di jutori pal letôr. 

Come che si viôt une ativitât leterarie no comun chê de Forte, ma nol baste, stant ch'a son di 'zontâ ancje lis tantis puisiis e prosis sparnizzadis tes publicazions di "Risultive", tes rivistis de Filologjche e in altris ancjemò. Une autore ch'e à puartât une impuartante tessare tal mosaic des letaris furlanis e insiorât la nestre lenghe. Di Marie Forte si ripuàrtin une puisie e tre slambris des sôs oparis.

Croseris

Tu sês fêr di mil agn

- cul timp rùsin tes mans -

su lis croseris,

a spartînus vias e voi sierâz

(son par nô stradis che no si sièlzin).

Si va ad aghe

e tantis fontanis dome cui voi.

Si va cun dople cjame

di distin e di passion.

Nol rive a daidivore il cûr.

Di gnot 'a sùnin chei pas

dentri il scûr,

nus talpìnin la vegle

fin 'e lûs de buinore.

Crist,