E jè une storie o une lejende, no lu sai. Di sigûr 'e à alc di fantastic che nus fâs restâ cence peraulis. Jò le ai sintude di Celso dal Mulin, di San Florean, che le veve sintude contâ di so nono, Tite Slis. Alôre si sa che San Florean al è simpri stât un puest plen di risultivis e di aghis, flums come le Ledre e l'Orgelât e canai faz a pueste dai omps par sfrutâ le fuarce da l'aghe, come lis rois Grava 1A e Gava 2A che movevin mulins, segheriis e une centraline eletriche. In chestis aghis claris, plenis di osigjno, l'ambient al ere bon par ch'e vivessin trutis, temui, gjavedons, gjambars e bisaz, ch'e fasevin gole no nome a Buje, ma ancje in dut il Friûl.

Tantis fameis 'e lavin duncje a pescjâ, cui ogni tant, cui pui dispess: Gobe, Bujan, Bigheran e son i prins che mi vegnin tal cjâf. Alôre si conte che tanc' ains fa, te roe dongje dal mulin di Pevar, al girave un bisat unevore grant, che nissun pescjadôr, nancje il pui brâf, al veve mai rivât a cjapâ. Intant i ains e passavin e le bestie e cresseve, tant di rivâ a proporzions che nissun al veve mai viodût chi di nô.

Come par cjoli atôr chê int, cheste bestie e saltave fûr da l'aghe cul cjâf e butave fûr siviladis tant fuartis di fâ drezzâ i cjavei. I pescjadors, un pôc parceche si sintivin cjols-vie, un pôc parceche 'e faseve dome damps mangjant-su dut ce ch'al viveve ta l'aghe, si son metûts d'acordo di cjapâle duc' insieme. Miôr se rivavin a cjapâle vive, parceche 'e valeve di pui sul marcjât. Dopo vê tentât di dut e cun duc' i sistemes, finalmentri 'e rivin a imbragâle e a puartâle a rive.

E jere propit un besteon straordenari, e pesave come quarante chilos dai nestris. A Udin 'e spetavin il bisat cun mil mans, cun curiositât e cun gole. Nol ere facil, però, puartâlu jù e cussì, ae fin, lu an metût tal miez tra un cos e chel âtri, un sot un parsôre e lu an leât cun dos cuardis suntun cjâr tirât di doi cjavai.

E vie, cun daur duc' i omps in prucission. Il bisat par un pôc nol à dât segno di sei malcujet, ancje parceche forsit al ere strac de lote cui pescjadôrs, ma rivât a Colorêt, te concje par rivâ a Pagnà, al tache a smenâsi. Al veve nulît che erin dongje di un puest di palût e alôre al à tacât a sbufâ e a sivilâ cussì fuart che al semeave un dinosauro.

 Chei omps che lu compagnavin e an tacât a vê pôre e ae fin e an decidût di lassâlu lâ. I doi pui coragjôs e an tajade le cuarde e cussì il bisat al è saltât ju e al è lât a pierdisi tal palût. Nissun lu à viodût pui, ma cui che al à cirût di lâ dongje chei lucs al conte di vêlu sintût a sivilâ, simpri pui rabiôs. Cheste lejende no le contavin tant vulintîr a San Florean, propit parceche al è paîs di pescjadôrs e il bisat al ere stât un smaco par lôr.

(Raccolta da Gino Calligaro, della scuola "Maria Forte", presso Guido Brini, nato nel 1938, che l'ha trascritta interpretando ricerche storiche e tradizioni di San Floreano, curate da Pier Lodovico Ursella).