XXIX

De factionibus et plovigiis in viis publicis et pascuis.

Statuerunt et ordinaverunt quandocumque fuerit opus buscandi vel extirpandi pascua Comunia vel potandi vel remondandi vias publicas vel faciendi aliquod opus quod fuerit expediens aut necessarium in beneficium aut utilitatem publicam teneatur et debeat quilibet Vicinus et homines subiecti ipsi Comunitati et Gastaldie, videlicet unus pro foco, laborare et facere opera necessaria aut mittere personas sufficientes ad laborandum non obstante excusatione alicuius Vicini huius Comunitatis et hominum Villarum subiectarum dicentis non habere animalia et si quis id facere recusaverit cadat in penam denariorum aquilegensium XLVIII applicandorum DD. Massario et Consiliariis et niilominus teneatur facere operam ad requisitionem Comunitatis.