Nol capite daspès che la flame de puisie e scomenci ad ardi te anime dal poet cuanche l'etât no je plui verde. Ma a voltis al sucêt. Cert, in chest câs al è clâr che alc si disfante, magari un fregul di vivôr, ma par cuintri si cuiste in sperience, in capacitât di riflession, in tamês critic, elements che a contribuissin a saborâ la vene poetiche e a fâ di levan a l'espression artistiche.

E je un pôc la vicende leterarie ch'e à vivût Francescje Barnaba-Marini (1877-1960), ma cun tune diference: che seben rivade ae poesie no adore, e je rivade a mantignî vîfs ancje il calôr e la fuarce de etât verde, rivant a conservâ il cûr di frute.

Francescje Barnaba-Marini e je nassude a Majan, ma e à vivût scuasi simpri a Buje. Dal sigûr il sverdeâ de nature, lis culinis, l'armonie e la puisie ch'e veve dulintôr le àn compagnade di lunc fintrimai che il mont ch'e veve parentri al è flurît in jê cun tune poetiche ispirade, mo vivarose mo suturne, fate di sensazions e di inmagjinis che j fasevin a cjâr tal cûr.

Des puisiis di cheste autore, al à scrit D'Aronco che cuanche j es presentàrin par une valutazion, nol acetà tant vulintîr, stant che daspès al capite di lei filainis cun pocje sustanzie, e la pene che si prove a leilis e je compagne di chê che si sint co si à di dî la veretât al gnûf "poet". E invecit la sorprese e je stade di D'Aronco, parceche chê ch'al veve denant e jere une puisie frescje, gnove, ispirade.

Lontane dai grops culturai, des modis e dai academisins, la nestre autore e à scoltât dome ce che j diseve il cûr, scrivint puisiis furlanis ch'e àn scjaldât l'anime a unevore di lôr ch'e àn vût la furtune di cognossi il so mont poetic.

Nadia Pauluzzo e à scrit ch'al è faturôs inmagjinâ ce sorte di meracul ch'al à permetût a cheste scritore di esprimi lirichis che a pàndin il cûr de prime zoventût cu la gjonde cree dai sedis agns, ancje se dal alt de sô vite un vêl di marum al compagne lis sôs composizions. E par riferî un esempli bastarà lei e fermâsi un marilamp su "Pâs", une frescje vision ch'e je come un cuadri che no si pò dismenteâ:

Fra odôr di uve in flôr

e di mentuce

la gran' pâs de gnot.

Vôs rauches di crots

si jevin fra lis cjanis

dal fossâl

c il concert dai grîs

al jemple l'ajar.

Tal cîl un furmiâr di steles;

tal cûr un pugnut di siums;

lajù, sot un cjar,

un feralut mataran ch'al bale

e al pâr un fûc svoladi.

Une scritore ch'e veve un scrivi limpit e insiorât di peraulis justis che a còlin a plomp par esprimi i soi pinsîrs, il so sintî.

Lis puisiis di Francescje Barnaba-Marini a son stadis metudis adun tune publicazion dal titul "Flôrs di tale", publicazion vignude fûr dal '54 e po ristampade dal '62, dopo la muart de autore. Lis ricoltis e àn vût la presentazion di D'Aronco.

Un'altre edizion di "Flôrs di tale" e je vignude fûr dal '94 cu la presentazion dal gjornalist Mauro Tosoni, ch'al fevele dal ûs rafinât des formis retorichis par esprimi lis vibrazions de sô anime e de limpide forme estetiche de sô puisie.

Ca e là e ven in lûs la maluserie pal inesorabil passâ dal timp, ma il timp nol à dome une dimension: un moment di gjonde, une zornade serene, l'alternâsi des stagjons e l'afiet pes personis che a stan par dongje, a son une sorte di segnelibri de nestre vite. Salacôr la plui significative liriche di Francescje Barnaba-Marini e je "Soi pronte", une puisie dulà che la poetesse e viôt come tun spieli il so passât di gjonde e di dolôr, il so presint e l'avignî discognossût, dute la sô vite ch'e durarà inmò dopo di jê, il lusî dal soreli, il cîl, la campagne, il mont che jê e sta par bandonâ: come un dolôr bielzà patît.

Une autore delicade e plene di sensibilitât, duncje, e seancje rivade ae puisie sul tart de vite, instes e à regalât moments di comozion ai soi letôrs, contribuint ancje a puartâ la sô tessare di umanitât e bielece tal mosaic de leterature furlane.

L'ultime edizion di "Flôrs di tale" e comprent une puisie di jentrade che si podarà lei in somp a chestis notis, un grop di lirichis par ogni stagjon, une puisie di siarade e un groput di vot contis, ricuarts di zoventût, di personis, di lûcs, stant che la nestre autore e à vût scrit ancje in prose.