XXXI

De pena pascuantium in terrenis aliorum per forenses.

Statuerunt et ordinaverunt quod si aliquis Vicinus et habitator Villarum subiectarum ipsi Gastaldie invenerit Forenses de die pascuare in suis Braidis, Campis, Pratis, Baiarzis, Viridariis, Silvis, Nemoribus et similibus eius bonis cum cuiuscumque generis animalibus cadat in penam Marche Denariorum Aquilegensium unius pro capite grosso et pro capite minuto dimidie, applicande dimidie Fabrice Ven. ecclesie D. Laurentii Buje et annexarum et alia dimidia Nob. D. Capitaneo et ad emendationem damni illati iuxta extimationem duorum Virorum a Magnifico Consilio Deputandorum; si vero quis repertus fuerit de nocte incurrat penam duplam, ut supra applicandam et credatur domino vel inventori cum iuramento si fuerit homo bone riputationis et fame.